Kash hum aur qareeb hotay…

Posted by Knonie

Kash hum aur qareeb hotay
Dil nahi tou na sahi
Ghar he nazdeek hotay

Har sham ka hamain
becheni say intezar hota
“Oye jaldi bahir aa” wala message
Phir aksar sath wali market mein jana
Chips aur Coke pakkar kar kaheen nikkal parna
Kuch din bhar ki batain karna
Kabhi puranay khuwab torna aur naye khuwab banana
Aur kabhi buhut hansna aur hansana

Phir sham gehri honay par wapis aana
Ghar k bahir kharray huye bhi bachi hui batain karna
Aur kartay he jana
Phir buhut baar Khuda Hafiz keh kar bhi alag na hona

Aur kabhi chhuti kay din
Wo tumhara meri taraf raat guzarna
Buhut si batain karna
Kaainat ki har cheez ki
Kabhi rangon say khelna
Kabhi tasveeron say

Raat honay par kabhi chhat par chalay aana
Sitaray aur chaand dekhna
Mil kar khamoshi ki awaz sun’na
Chhup kar cigarette bhi peena
Aur ye sochna k ye raat kabhi khatm na ho

Aao ab sotay hain, tumhara ye kehna
Aur mera wo chhota sa bistar
Jo hamaray liye buhut barra hota
Ussi par aahista aahista batain kartay kartay so jana

Ab uth jao aur baqi neend apnay ghar ja kay karna
Tumhara ankhain khol k mujhay aisay dekhna
jesay main bhi tumharay khuwab ka hissa hoon

Tumhari wo soi hui soorat
Aur neend bharri awaz
Ye poochna k itni jaldi subah kiyoon ho gayi

Kash hum aur qareeb hotay
Dil nahi tou na sahi
Ghar he nazdeek hotay

 

— Knonie, September 2013

20131003-064903.jpg


Leave a Reply

Verify your sanity: